Kaszëbsczi kabaret Fif - Zaczątczi
Bëlo to na zymkù 2000 rokù... Jednégò razë zeszlë są na piwie trzej bówce. Pili so, smielë sã ë gôdalë. Ale czimże je gôdanié dlô gôdaniégò. Niczim! Dlôte ùmëslëlë òni zrobic cos, żebë na swiece bëlo kąsk wieseli. KABARET! A żebë bëlo jesz lepi - to kaszëbsczi kabaret. Pò jaczims czasu jeden z nëch bówków rzekl, że jémù je strach na bunie wëstãpòwac... Nie bëlo radë: Pioter 
Cëskòwsczi ë Róman Drzéżdżón mùszelë sami wzyc sã za robòtã.
Pierszi wëstãp bél w Lesniewie. Wëszło jima nawetka dosc dobrze, ale fùl bùksë strachù téż mielë. Pózny glëpielë òni tam a sam, nôczãscy na nordze Kaszëb. Nôwicy lëdze klepalë w jejich rodnëch wsach: w Chlapòwie a Starzënie dze przëszlë jech, dosc wiôldżé, familëje...
Jednégò dërch wcyg jima fela - mùzyczi. Ale do czegò są drëchòwie? Bél taczi w Rëmi - bard a pòéta Michôl Piépier, co przódë robil za spiéwôka w rockòwim karnie Chëcz. Tak wiãc, gralë òni terô trzeji na wszelejaczich binach Pòlsczi. Nôdali bëlë w Zabrzu, gdze próbòwalë naùczëc kaszëbsczégò Szlązaków. Za wiele z tegò nie wëszlo, ale próbòwac wiedno je wôrt.
Pózny miast Michôla, grôl z nima pùcczi pòéta Jerzi Lisk, a na zymkù 2003 rokù przëszëdl do karna Słôwk Gòjka, chtërny grôl na gitarze. Sklôd zmienil są zôs òb lato. Z karna wëpisôl sã Róman, chtërny jednakò jesz dërch wëspólrobi z Piotrã ë Slôwkã.
Òkróm wëżi wëmienionëch z kabaretã wëstãpòwale: Adam Drzéżdżón ë Grégòr Schramke. Wôrt je dopòwiedzec, że w Zabrzu "Fif" towarzëszël na binie szląsczémù kabaretowi Rak, a we Warszawie niemiecczémù fifmanowi Steffenowi Möllerowi.
Nôt je rzec téż cos ò mionie kabaretë: Fif. Wejle, je to pëszné stôré kaszëbsczé słowò, co znaczi tëli co szpòrt, wic abò szpôs.